Ayaqda damar ağrısı

Venalarda güclü ağrılar dərhal deyil, tədricən yaranır. Başlanğıcda ayaqda damar ağrısı yalnız gərgin iş gününün sonunda meydana çıxır. Dinamik həyat tərzi ilə əlaqədar insanların əksəriyyəti bu əlamətə fikir verməyib, onu yorğunluqla əlaqələndirir. Zaman keçdikcə damar ağrısı hətta sakitlik vəziyyətində, yəni yuxu və istirahət saatlarında da xəstəni narahat edir.

Ayaqda damar ağrısı nə ilə əlaqədardır?

Ağrı varikoz damar genişlənməsinin əlamətlərindən sayılır. Daha kəskin və davamlı xarakterli damar ağrısı tromboflebitə işarədir. Bu isə təhlükəli xəstəlikdir. Onun qarşısını almaq həyat və sağlamlığınızı qorumaq deməkdir.

Ümumiyyətlə, mütəxəssislərin fikrincə damar ağrısı çox zaman irsi xarakter daşıyır. Belə ki, hər 2 valideyni varikozdan əziyyət çəkən insanda bu problemin yaranma ehtimalı təxminən 89% təşkil edir. Ailə üzvlərinin yalnız birində (ana və ya atada) venaların genişlənməsi övladda bu patologiyanın formalaşma riskini 47%-ə qədər azaldır.

Varikoz təkcə irsi meyllik deyil, həm də əlverişsiz amillərin təsirindən inkişaf edir. Bu faktorlara peşə fəaliyyəti (müəllim, cərrah, satıcı, sürücü), qeyri-düzgün həyat tərzi və hamiləlik dövrünü misal göstərmək olar.

Risk zonasına ayaqüstü və ya oturaq işlə məşğul olan şəxslər də daxildir. 30 dəqiqə müddətində eyni vəziyyətdə qaldıqda ayaqda qanın həcmi artır. Yarım saat ərzində bu göstərici normadan 300 ml yuxarı qalxır. Məhz belə artım damar genişlənməsi və onun ağrısı ilə müşayiət olunur.

Digər risk amillərinə artıq çəki, hormonal pozğunluqlar, tez-tez təkrarlanan aviauçuşlar və ya avtomobildə səyahət, xroniki stress, hündürdaban ayaqqabılar aiddir.

Ayaqda damar ağrısı nədən yaranır?

Ayaqda ağrı hissi damarların funksiyasının pozulması səbəbindən əmələ gəlir. Xəstələrdə venaların divarları nazilir, damarların elastikliyi azalır. Ayrı-ayrı hissələrdə qan yığınına rast gəlinir. Damar divarı iltihablaşır. Qan qatılaşdığından zəif hərəkət edir, venaların divarına təzyiq artır.

Əlavə yüklənmə damarların vəziyyətinə mənfi təsir göstərir. Nəticədə venalar şişkinləşir, ayaqlarda ağrı baş verir. Xəstəliyi ilkin mərhələlərdə müalicə etmək lazımdır. Çünki gecikmiş dövrlərdə ayaqda damar partlaması, trofiki yara, tromboz kimi fəsadlar əmələ gəlir.

Ayaqda damar ağrısı necə aradan qaldırılır?  

Bəzi insanlar ayaq ağrıları ilə qarşılaşdıqda damar üçün mazlardan istifadə edirlər. Lakin yerli təsirli vasitələr yalnız çəkildiyi müddətdə narahatlıqları aradan qaldırır. Damara birbaşa təsir edilmədiyindən xəstəlik daxildə öz inkişafını davam etdirir.

Zamanla venalarda geridönməyən dəyişikliklər meydana çıxır. Ciddi ağırlaşmalara yol verməmək üçün yüngül ağrılarda belə damar həkiminə müraciət etmək lazımdır.

Ayaqda damar ağrısının profilaktikası  

Varikoz xəstəliyinin qarşısını almaq məqsədilə fleboloqlar üzgüçülüklə məşğul olmağı, piyada gəzintilərinə yer ayırmağı məsləhət görürlər. İş fəaliyyətinizlə əlaqədar gün ərzində uzun müddət ayaq üstə qalmağa və ya masa arxasında işləməyə məcbursunuzsa, hər 2-3 saatdan bir bədən vəziyyətinizi dəyişin. Ayaqlarınızı bir-birinin üzərinə aşırıb oturmayın.

Həmçinin qida rasionunuza fikir verin. Yaşıl alma, kələm, dəniz məhsulları, sitrus meyvələrinin qəbulunu artırın. Yağlı və qızardılmış yeməkləri ixtisara salın.

Onu da qeyd etmək lazımdır ki, varikoz diaqnozu qoyulan pasiyentlərə isti vannalar və sauna xidmətləri əks-göstərişdir. Belə ki, isti prosedurlar venalarda qanın toplanmasını artırmaqla, onları yükləndirir.

Erkən mərhələlərdə həkim məsləhətlərinə əməl etsəniz, venaların cərrahi yolla aradan qaldırılmasına ehtiyac yaranmayacaq.