Ayaq ağrısı
Ayaq ağrısı gündəlik həyatımızda tez-tez rastlaşdığımız problemlərdən biridir. Bəs ayaq ağrılarının səbəbi nədir?
- Uzun müddət narahat vəziyyətdə dayanmaq, xüsusən də bir ayağı o birinin üstünə aşırıb oturmaq
- Varikoz xəstəliyi
- Vitamin və mikroelement (D vitamini, kalsium və maqnezium) çatışmazlığı
- Maddələr mübadiləsinin və vəzilərin fəaliyyətinin pozulması
- Həyat tərzi (məs., ağır atletika ilə məşğul olmaq, az hərəkətlilik)
- Hamiləlik dövrü
- Qan dövranının pozulmasına səbəb olan xəstəliklər (diabet, epilepsiya, böyrək çatışmazlığı və s.)
- Yastıpəncəlik
- Ateroskleroz və s.
Ayaq ağrısı və varikoz
Ayaq ağrılarının müalicəsi üçün əvvəl ayaqlarda ağrı nəyə görə yaranıb, onu bilmək lazımdır. Mütəxəssislər ilk növbədə varikoza görə müayinə aparılmasını məsləhət görürlər. Çünki əksər insanlarda ayaq-baldır ağrısı məhz bu xəstəliklə əlaqəli olur.
Belə ki, damar genişlənməsi zamanı venoz qapaqların fəaliyyəti pozulduğundan qanda durğunluq yaranır. Nəticədə damar genişlənir, elastikliyi itir. Bu isə maddələr mübadiləsinin pozulmasına, əzələlərin qidalanmamasına və genişlənmiş damarların ətrafındakı sinirlərin sıxılmasına gətirib çıxarır.
Ayaq toxumasında baş verən bu dəyişikliklər isə ayaqda şişkinlik, əzələ ağrıları, keyimə və başqa əlamətlərlə özünü büruzə verir.
Bəs varikoz mənşəli ayaq ağrıları üçün nə etməli? Damar problemləri ilə fleboloqlar, o cümlədən damar cərrahları məşğul olduğundan belə hallarda mütləq qaydada savadlı mütəxəssisə müraciət etmək lazımdır. Varikozun ağır formalarında isə cərrahi müdaxilə qaçılmazdır.
Ayaq ağrısı cərrahi əməliyyatsız müalicə oluna bilər?
Bəli, bu mümkündür. Damar genişlənməsinin başlanğıc mərhələlərində varikoz corabları, ayaq ağrısı üçün dərman, maz və ya vannalar xəstənin vəziyyətini yüngülləşdirə bilər.
Probleminizdən asılı olaraq venalara tonus verən preparatlar – venotoniklər, tromb əmələ gəlməsinin qarşısını alan və yaxud qanı duruldan maz sizə daha uyğun ola bilər. Dəqiq seçimi isə damar həkimi etməlidir. Çünki özbaşına ayaq ağrısı üçün maz alıb istifadə etmək doğru deyil. Axı Siz preparatın əlavə təsirlərindən xəbərsizsiniz, bu isə xoşagəlməz hallarla sonlana bilər.
Ayaq vannaları müxtəlifdir. Onları duzlar, otlar, aromatik yağlar və başqa müalicəvi təsiri olan vasitələrlə hazırlamaq olar. Amma gərək bir məqama diqqət edəsiniz. Ayaqların ağrıması hansı səbəblə bağlıdırsa, məhz həmin problemə uyğun olaraq ayaq ağrısı üçün vanna növü seçilir.
Məsələn, damar genişlənməsi problemində kontrast vannalar; soda, bitki yağı, çobanyastığı çiçəyi, at şabalıdı ilə hazırlanan vannalar effektli olur.
Kontrast vanna etmək üçün 2 qab götürün birini isti, o birini isə soyuq su ilə doldurun. Ayağınızı gah bu, gah da o biri vannaya qoyun. Əgər uyğun qab tapa bilməsəniz, axar su altında bu proseduru edə bilərsiniz.
Yekunda onu qeyd edək ki, ayaq ağrısına etinasız yanaşmayın. Çünki bu kiçik problem böyük fəsadlara səbəb ola bilər.