Varikozun evdə müalicəsi

Bəzi insanlar damar genişlənməsini həkimə getmədən ev şəraitində müalicə etməyə çalışırlar. Xalq təbabətində varikozun təbii yolla müalicəsi üçün bir sıra üsullardan istifadə olunur. Varikozun evdə müalicəsi adətən aşağıdakı vasitələrlə aparılır:

1. Efir yağları
Masajla damar genişlənməsini müalicə etmək olmasa da, ayaqlarda qan dövranını yaxşılaşdırmaqla ödem və diskomfortu bir qədər azaltmaq mümkündür. Olibanum (Büxur), çobanyastığı, adaçayı, ətirşah, limon, lavanda və sərv yağı iltihabı azaldır, qan dövranını yaxşılaşdırır, ödemi zəiflədir.

2. Çobanyastığı, şabalıd və dərman xəndəkotunun çiçəkləri, gülxətmi bitkisi
Bu bitkilərin kökü bir yerə yığılır. Həmin qarışıqdan 1 xörək qaşığı götürülərək, üzərinə 1 stakan su əlavə edilir. Qaynayana kimi qızdırılır. Sonra süzülür və soyudulur. Bu dəmləmə ilə gün ərzində 2-3 dəfə kompress edilir.

3. Yaşıl pomidor
Pomidor doğranılır və düyünlərin üzərinə qoyulur. Yüngül yanğı hissi yaranana qədər saxlanılır. Sonra bədənin bu hissəsi sərin su ilə yuyulur. Proseduru sutkada 5 dəfə təkrarlamaq məsləhət görülür.

4. Eyni prosedur yetişmiş pomidorla da aparıla bilər
Nazik doğranmış dilimlər damarların daha çox qabardığı sahəyə qoyulur. 2-3 saatdan sonra yeniləri ilə əvəz edilir.

5. Alma sirkəsi
1 vedrə soyuq suya 0,5 litr alma sirkəsi əlavə olunur, ayaqlar 5 dəqiqə müddətində dizə qədər suya salınır. Soyuq su damarları stimulyasiya edir, sirkə isə tonuslandırır. Prosedurdan sonra ayaqlara hündür vəziyyət verməklə uzanmaq tövsiyə olunur.

6. Vitaminlər
Bəzi vitaminlər (vitamin K, C, E, B3 və B12) varikoz xəstəliyinin evdə müalicəsi üçün istifadə edilir. Onlar ürək-damar sisteminə müsbət təsir göstərərək, damar genişlənməsinin qarşısını alır və ya onun əlamətlərini azaldır.

7. At şabalıdı
At şabalıdı toxumları və yarpaqları qan dövranı problemlərinin, o cümlədən varikoz damarların təbii yolla müalicəsi üçün tətbiq edilir.

8. Şam ağacı qabığının ekstraktı
Bu ekstrakt damar genişlənməsi ilə əlaqəli meydana çıxan qıcolmalar və ödemləri aradan qaldırmağa kömək edir.

9. Çobanyastığı
Varikozun evdə müalicəsi üçün bu bitkinin budaqları, yarpaqları və qabığından ekstrakt hazırlanır və yerli istifadə olunur. Ekstrakt dəriyə tonus verir, onu sakitləşdirir.

10. Varikoz corablar
Varikoz corablar sağlam qan dövranını dəstəkləyir. Onu adətən, bütün gün boyunca geyinirlər və yatmazdan əvvəl çıxarırlar. Bu corablarla yatmaq olmaz, çünki qan dövranı zəifləyə və hərəkətdən məhrum ola bilərsiniz.

11. İdman
Varikozun ev şəraitində müalicəsi üçün ən yaxşı seçimdir. Belə ki, fiziki aktivlik qanın venalarda axmasını və ümumi əzələ tonusunu yaxşılaşdırır. Həftədə 2,5 saat idmanla məşğul olmaq məsləhət görülür.

12. Ayaqları hündürə qaldırmaq
Varikozun evdə müalicəsi üçün təklif etdiyimiz bu son üsulu hamı edə bilər. Arxası üstə zanın və ayaqlarınızı hündürə qaldırın. Bu zaman qanın venalardan ürəyə axını asanlaşdığından aşağı ətraflarda şişkinlik azalır.

Sonda vacib bir məqamı qeyd edək ki, ev şəraitində varikozun təbii üsulla müalicəsi effektiv deyil. Bu metodlar yalnız əlamətləri müvəqqəti olaraq, aradan qaldırmağa kömək edir. Damarlardakı dəyişikliklərə birbaşa təsir edilmədiyindən varikoz öz inkişafını davam etdirir.

Ona görə də belə bir ciddi xəstəliyi özünüz müalicə etməyə çalışmayın. Çünki bu üsullarla vaxt sərf edib, peşəkar müalicəni gecikdirdikdə xəstəlik ağırlaşa bilər. O üzdən varikozun ilkin əlamətlərini özünüzdə aşkar etdikdə, əlavə yollara əl atmadan fleboloqa – damar həkiminə müraciət etməyiniz məsləhətdir.