Varikoz müalicəsi
Damarların varikoz genişlənməsi təkcə estetik problem deyil. Bu, sağlamlığınız və hətta həyatınız üçün təhlükəli xəstəlikdir. Ona görə də damar partlaması, ayaqlarda ağrı və şişkinlik olanda müayinə olunmaq, diaqnoz təsdiqlənərsə, varikoz müalicəsi almaq vacibdir.
Varikozun müalicəsi həm konservativ, yəni əməliyyatsız, həm də cərrahi üsullarla aparılır. Qeyri-cərrahi metodlarla xəstəliyin gedişini yüngülləşdirmək və dayandırmaq mümkündür.
Konservativ üsullarla varikoz müalicəsi:
- Kompression terapiya – yəni xüsusi kompression geyimlər, məsələn, varikoz corabları və ya elastik bintlərlə aparılır. Bu metodla venalara təzyiq edərək onun qapaqlarının işi yüngülləşdirilir və qan dövranı yaxşılaşdırılır. Damar və dərinin bəzi xəstəlikləri bu metodun istifadəsinə əks göstərişdir.
- Dərman terapiyası – daxilə və yerli (mazlar) preparatlarla aparılır. Kapilyar damarların müalicəsi üçün istifadə olunan preparatlar venaların tonusunu artırır (venotonik), iltihab və ağrı əleyhinə təsir edir, qanı isə durulaşdırır (antikoaqulyant).
Hamilə və süd verən analar venotoniklərdən istifadə etməməlidir. Antikoaqulyantları qəbul edərkən isə qanın laxtalanma göstəriciləri analiz olunur.
Ayaqda çıxan damarların müalicəsi Doppler müayinəsi vasitəsilə venaların vəziyyəti dəyərləndirildikdən sonra seçilir.
Varikoz müalicəsi – cərrahiyyənin imkanları
Venektomiya
Bu üsulu venaların quruluşu normaya uyğun olmayanda və ya xəstəliyin ağır gedişində istifadə olunur. Əməliyyatdan sonra aktiv həyat tərzi və kompression terapiya təyin olunur.
Az invaziv metodlar
Hazırda ayaq damarlarının müalicəsi üçün az travmatik, narkozsuz həyata keçirilən metodlara üstünlük verilir.
- Endovenoz lazer ablasiya (EVLA) – varikoz xəstəliyinin bütün ağırlıq dərəcələrində kəsik aparılmadan narkozsuz tətbiq olunan üsuldur. Güclü venoz çatışmazlıq, venoz damarın diametrinin ölçüsü bu metodla müalicəyə əngəl ola bilməz.
- Radiotezlikli ablasiya – bu metod məğzinə görə lazer koaqulyasiyaya oxşayır. Fərq ondadır ki, bu metodda zədələnmiş venalar lazerlə deyil, radiotezlikli şüalanma ilə “bağlanır”. Əməliyyat hamilə və körpəsinə süd verən analara, ayaq arteriyalarının aterosklerozu və yeriməkdə çətinlik çəkən insanlara məsləhət görülmür.
- Miniflebektomiya – prinsip ondadır ki, xüsusi alətin köməyilə kiçik kəsik aparılır, vena düyünü və damarı kəsilib çıxarılır. Metod izolə olunmuş varikozda və lazer koaqulyasiyadan, radiotezlikli ablasiya və ya cərrahi flebektomiyadan sonra tətbiq olunur.
- Skleroterapiya (iynə üsulu)– səthi venaların və kapilyarların müalicə metodudur. Skleroterapiya həm genişlənmiş damarları, həm də estetik məqsədlə – damar ulduzcuqları və torlarını ləğv etmək üçün istifadə olunur. Tromboflebitdən əziyyət çəkən şəxslərə, hamilə və süd verən analara bu metoddan istifadə etmək məsləhət görülmür.
Varikoz müalicəsi və qiyməti tətbiq olunan üsuldan asılıdır. Bakıda yerləşən tibb müəssisələrində Skleroterapiyanın 1 seansının orta qiyməti 100 azn, Lazer üsulu ilə aparılan əməliyyatların qiyməti isə 900-1500 azn arasında dəyişir.
Beləliklə, varikoz müalicəsi həm əməliyyatsız, həm də cərrahiyyə metodlarla aparıla bilər. Hansı metodun seçilməsi isə pasientin vəziyyətindən və həkimin taktikasından asılıdır.