Varikoz xəstəliyi

Varikoz xəstəliyi – venoz qapaqların zədələnməsi və qan dövranının pozulması nəticəsində yaranır. Varikoz nədir və onunla necə mübarizə aparmalıyıq? Bütün bu suallara məqalədə aydınlıq gətirək.

İlk növbədə xəstəliyin risk faktorlarından başlayaq. Varikozun yaranmasına səbəb olan amillər aşağıdakılardır:

• İrsi meyillik
• Hamiləlik
• Artıq çəki
• Hormonal balansın pozulması
• Həyat tərzi
• Dar geyimlər və s.

Varikoz xəstəliyi hansı əlamətlərlə özünü göstərir? Damar genişlənməsi zamanı ayaqlarda ağrı, şişkinlik, dəri dəyişikləri, qaşınma, ağırlıq hissi, damar ulduzcuqları meydana çıxır. Fleboloqlar bu simptomları səthi və dərin venalarda qan dövranının pozulması ilə əlaqələndirirlər.

Xəstəliyin ilk simptomlarından biri ayaqda kapilyar torunun yaranmasıdır. Bunu Siz özünüz də adi gözlə görə bilərsiniz. Belə defektləri qadınlar baldır və ya bud nahiyələrində əvvəllər olmayan damar çıxması kimi izah edirlər. Bəzən narahatlıqlar sırasına ağrı da qoşulur.

Başlanğıc mərhələdə bu təzahürlər heç bir ciddi əlamətlə müşayiət olunmur. Sadəcə kosmetik qüsur kimi qadınların narahatlığına səbəb olur. Proses irəlilədikcə daha ciddi problemlər: varikoz düyünlər, ayaqlarda yanğı hissi, tromblaşma və s. əmələ gəlir.

Varikoz xəstəliyi və onun müalicəsi

Varikoz xəstəliyi sağlamlığı, hətta həyatı təhlükə ilə üz-üzə qoyan ciddi bir patologiyadır. Belə bir xəstəlik təbii ki, savadlı mütəxəssis tərəfindən müalicə olunmalıdır. Əksər insanlar varikozun ev şəraitində müalicəsi ilə maraqlanırlar. Amma bu üsulların heç biri problemi həll etmir, sadəcə  simptomları aradan qaldıraraq “yalançı sağalma” effekti yaradır. Proses isə daxildə öz inkişafını davam etdirir. Ağırlaşmalara yol verməmək üçün mütləq damar həkimi tərəfindən müalicə təyin olunmalıdır.

Varikoz adətən 2 yolla: cərrahi və qeyri-cərrahi yolla müalicə olunur.

Başqa damar xəstəlikləri ilə müayisədə varikoz əlamətləri durğunluğun nəticəsi olduğundan müalicə taktikası, xüsusən də qeyri-cərrahi, yəni konservativ müalicə də məhz bu problemi aradan qaldırmağa yönəldilir.

Varikozun konservativ müalicəsi dərman terapiyası və damar corablarının istifadəsindən ibarətdir.

Dərman terapiyası tabletlər və mazlar vasitəsilə daxilə və yerli təyin olunmaqla aparılır. Bu zaman müalicə kurs şəklində uzun müddətə təyin olunur.

Kompression terapiya isə varikoz corabları və elastik bintlərin köməyi ilə icra olunur. Bu geyimlər mexaniki şəkildə venaların tonusunu artırır və qan dövranını yaxşılaşdırır.

Dərin venalarda ciddi dəyişikliklər olduqda cərrahi müalicə üsullarına üstünlük verilir:

• Endovenoz lazer ablasiya
• Radiotezlikli koaqulyasiya
• Miniflebektomiya

Müasir dövrdə varikozun müalicəsində Skleroterapiya (iynə üsulu) və Endovenoz Lazer Ablasiya geniş tətbiq olunur. Hər 2 metod narkozsuz və kəsiksiz yerinə yetirilir.

Miniflebektomiya da narkozsuz, amma kiçik kəsiklə aparılan cərrahi müdaxilədir. Onu az invaziv metodlar sırasına daxil edirlər.

Bütün bu yazılanları ümumiləşdirərək bildiririk ki, varikoz hazırda bütün dünyada geniş yayılmış xəstəlikdir. Onun müalicəsi gecikdirildikdə ciddi fəsadlar yarana bilər. Bu səbəbdən probleminizə laqeyd yanaşmayın və onu vaxtında həll edin.