Varikoz müalicəsi
Damarların varikoz genişlənməsi təkcə estetik problem deyil. Bu, sağlamlığınız və hətta həyatınız üçün təhlükəli xəstəlikdir. Ona görə də damar partlaması, ayaqlarda ağrı, şişkinlik zamanı müayinə olunmaq, və varikoz müalicəsi almaq vacibdir.
Varikozun müalicəsi həm konservativ, yəni əməliyyatsız, həm də cərrahi üsullarla aparılır. Qeyri-cərrahi metodlarla xəstəliyin gedişini yüngülləşdirmək və dayandırmaq mümkündür.
Konservativ üsullarla varikoz müalicəsi:
- Kompression terapiya – yəni xüsusi kompression geyimlər, məsələn, varikoz corablar və ya elastik bintlərlə aparılır. Bu metodla venalara təzyiq nəticəsində qapaqların işi yüngülləşir, qan dövranı yaxşılaşdırılır. Damar və dərinin bəzi xəstəlikləri bu metodun istifadəsinə əks göstərişdir.
- Dərman terapiyası – daxilə qəbul edilən və yerli təsirli (mazlar) preparatlarla aparılır. Kapilyar damarların müalicəsi üçün istifadə olunan preparatlar venaların tonusunu artırır (venotonik), iltihab və ağrı əleyhinə təsir edir, qanı durulaşdırır (antikoaqulyant).
Hamilə və süd verən analar venotoniklərdən istifadə etməməlidir. Antikoaqulyantları qəbul edərkən isə qanın laxtalanma göstəriciləri təhlil olunmalıdır.
Ayaqda çıxan damarların müalicəsi Doppler müayinəsi vasitəsilə venaların vəziyyəti dəyərləndirildikdən sonra seçilir.
Varikoz müalicəsi – cərrahiyyənin imkanları
Venektomiya
Bu üsul əvvəllər damar genişlənməsinin gecikmiş mərhələlərində istifadə olundu. Əməliyyatdan sonra aktiv həyat tərzi və kompression terapiya təyin olunurdu. Hazırda açıq üsullar öz yerini müasir (az invaziv) metodlara vermişdir.
Az invaziv metodlar
İndiki zamanda ayaq damarlarının müalicəsi üçün az travmatik, narkozsuz həyata keçirilən metodlara üstünlük verilir.
- Endovenoz lazer ablasiya (EVLA) – varikoz xəstəliyinin bütün ağırlıq dərəcələrində kəsik aparılmadan, narkoz verilmədən tətbiq olunan üsuldur. Güclü venoz çatışmazlıq, venoz damarın diametrinin ölçüsü bu metodla müalicəyə əngəl ola bilməz.
- Radiotezlikli ablasiya – mahiyyət etibarilə lazer koaqulyasiyaya oxşayır. Fərq ondadır ki, bu metodda zədələnmiş venalar lazerlə deyil, radiotezlikli dalağaların köməyilə “bağlanır”. Əməliyyat hamilə və süd verən analara məsləhət görülmür.
- Miniflebektomiya – xüsusi alətin köməyilə kiçik kəsik aparılır, vena düyünü və damarı kəsilib çıxarılır. Metod izoləolunmuş varikozda, eləcə də lazer koaqulyasiya, radiotezlikli ablasiya ilə birgə yerinə yetirilə bilər.
- Skleroterapiya (iynə üsulu) – səthi venalar və kapilyarların müalicə metodudur. Skleroterapiya həm genişlənmiş damarları, həm də estetik məqsədlə – damar ulduzcuqları və torlarını ləğv etmək üçün istifadə olunur. Tromboflebitdən əziyyət çəkən şəxslərə, hamilə və süd verən analara bu metoddan istifadə etmək tövsiyə olunmur.
Varikoz müalicəsi və qiyməti tətbiq olunan üsuldan asılıdır. Bakıda yerləşən tibb müəssisələrində Skleroterapiyanın 1 seansının qiyməti 100-200 AZN, Lazer üsulu ilə aparılan əməliyyatların qiyməti isə 900-1500 AZN arasında dəyişir.
Beləliklə, varikoz müalicəsi həm əməliyyatsız, həm də cərrahiyyə metodlarla aparıla bilər. Hansı metodun seçilməsi isə pasientin vəziyyətindən və həkimin taktikasından asılıdır.